ជំនាញ រដ្ឋបាលសាធារណៈ

សាលាក្រោយឧត្ដម នឹងអភិវឌ្ឍន៍ខ្លួនយ៉ាងសកម្ម ដើម្បីសម្រេចបាននូវចក្ខុវិស័យរួមរបស់សាកលវិទ្យាល័យ ជាពិសេស ដើរតួនាទីថ្នាលបណ្ដុះបណ្ដាលធនធានបញ្ញាជនជាន់ខ្ពស់របស់ជាតិប្រកបដោយគុណភាព និងប្រសិទ្ធភាព ដើម្បីឈានទៅរកឧត្ដមភាពដណ្ដើមឈ្នះក្នុងកម្រិតជាតិ និងអន្តរជាតិ។

កម្មវិធីសិក្សាថ្នាក់បរិញ្ញាបត្រជាន់ខ្ពស់ ជំនាញរដ្ឋបាលសាធារណៈ (Master in Public Administration) នៃសាកលវិទ្យាល័យ អាស៊ី អឺរ៉ុប ត្រូវបានរចនាឡើងយ៉ាងសម្រិតសម្រាំងស្របតាមគោលការណ៍នៃការអប់រំផ្អែកលើលទ្ធផល (Outcome-Based Education - OBE) និងរចនាសម្ព័ន្ធអភិវឌ្ឍន៍សមត្ថភាពស្រាវជ្រាវកម្រិតខ្ពស់ (By Research Report Writing) ដោយយកនិស្សិតជាស្នូល (Student-Centered Learning)។ កម្មវិធីនេះមានគោលបំណងបណ្តុះបណ្តាលនិស្សិតឱ្យមានចំណេះដឹងស៊ីជម្រៅ សមត្ថភាពវិភាគ និងជំនាញដឹកនាំវិជ្ជាជីវៈច្បាស់លាស់ តាមរយៈការធ្វើសមាហរណកម្មលើទ្រឹស្តីរដ្ឋបាលសាធារណៈ ការគ្រប់គ្រងសាធារណៈថ្មី ការកែទម្រង់រដ្ឋបាល គោលការណ៍អភិវឌ្ឍន៍អភិបាលកិច្ច និងប្រព័ន្ធរដ្ឋបាលឌីជីថល (E-Government) ដើម្បីជំរុញប្រសិទ្ធភាពការងារ ភាពជាអ្នកដឹកនាំ និងការបម្រើសេវាសាធារណៈប្រកបដោយតម្លាភាព ឆ្លើយតបទៅនឹងការ វិវត្តនៃសង្គមយុគសម័យឌីជីថល សាកលភាវូបនីយកម្ម និងការធ្វើសមាហរណកម្មអាស៊ាន។

ឱកាសការងារ សម្រាប់និស្សិត

ថ្នាក់បរិញ្ញាបត្រជាន់ខ្ពស់ រដ្ឋបាលសាធារណៈ

ក្រោយពីទទួលបានបរិញ្ញាបត្រជាន់ខ្ពស់ រដ្ឋបាលសាធារណៈ អ្នកសិក្សាអាចទទួលបាននូវឱកាសការងារដូចខាងក្រោម៖

ក. វិស័យវិជ្ជាជីវៈផ្ទាល់ និងការប្រឹក្សាយោបល់ (Professional & Advisory Sector)

• អ្នកជំនាញនិងអ្នកវិភាគគោលនយោបាយ៖ ធ្វើការវិភាគ វាយតម្លៃ និងរៀបចំគោលនយោបាយសាធារណៈ ព្រមទាំងធ្វើជាទីប្រឹក្សា និងអ្នកគ្រប់គ្រងផែនការយុទ្ធសាស្ត្រក្នុងវិស័យសាធារណៈ។
• អ្នកឯកទេសអភិបាលកិច្ចនិងកំណែទម្រង់ឌីជីថល៖ ផ្តល់សេវាកម្មប្រឹក្សាយោបល់លើការរៀបចំរចនាសម្ព័ន្ធអភិបាលកិច្ច ការគ្រប់គ្រងការផ្លាស់ប្តូរ និងការធ្វើបរិវត្តកម្មរដ្ឋបាលឌីជីថល (Digital Transformation) នៅក្នុងស្ថាប័ន។

ខ. ឱកាសការងារក្នុងវិស័យរដ្ឋ (Public & Government Sector)

• មន្ត្រីរាជការជាន់ខ្ពស់និងអ្នកគ្រប់គ្រង៖ បំពេញការងារជាមន្ត្រីរាជការ សម្របសម្រួល និងប្រធាននាយកដ្ឋាន/ការិយាល័យ ពិសេសផ្នែកព័ត៌មានវិទ្យា ផែនការ និងការកែទម្រង់រដ្ឋបាលឌីជីថល នៅតាមបណ្តាក្រសួង-ស្ថាប័នរដ្ឋនៃរាជរដ្ឋាភិបាល។
• អ្នកគ្រប់គ្រងរដ្ឋបាលថ្នាក់ក្រោមជាតិ៖ ធ្វើជាមន្ត្រីរដ្ឋបាល និងអ្នកគ្រប់គ្រងដឹកនាំនៅរដ្ឋបាលថ្នាក់ក្រោមជាតិ (រដ្ឋបាលរាជធានី ខេត្ត ក្រុង ស្រុក ខណ្ឌ) ព្រមទាំងធ្វើជាមន្ត្រីសវនកម្ម និងអ្នកគ្រប់គ្រងហិរញ្ញវត្ថុសាធារណៈ។

គ. វិស័យឯកជន និងកិច្ចការសាធារណៈ (Private Sector & Public Affairs)

• អ្នកគ្រប់គ្រងទំនាក់ទំនងរដ្ឋាភិបាលនិងសេវាឌីជីថល៖ បម្រើការងារជាអ្នកគ្រប់គ្រងផ្នែកកិច្ចការ សាធារណៈ (Public Affairs), គ្រប់គ្រងប្រព័ន្ធព័ត៌មាន និងការប្រាស្រ័យទាក់ទងជាមួយប្រព័ន្ធសេវាសាធារណៈតាមអ៊ីនធឺណិត (E-Services) របស់រដ្ឋាភិបាលសម្រាប់ក្រុមហ៊ុនឯកជនធំៗ។
• អ្នកដឹកនាំយុទ្ធសាស្ត្រនិងទំនួលខុសត្រូវសង្គម៖ ធ្វើជាអ្នកគ្រប់គ្រងទូទៅ ទីប្រឹក្សាយោបល់ផ្នែកយុទ្ធសាស្ត្រ អាជីវកម្ម ការគ្រប់គ្រងការផ្លាស់ប្តូរ និងអ្នកគ្រប់គ្រងផ្នែកទំនួលខុសត្រូវសង្គមរបស់ក្រុមហ៊ុន (CSR)។

ឃ. ស្ថាប័ន និងអង្គការអន្តរជាតិ (International Agencies & NGOs)

• មន្ត្រីគ្រប់គ្រងកម្មវិធីនិងគម្រោង៖ គ្រប់គ្រង និងសម្របសម្រួលគម្រោងអភិវឌ្ឍន៍សង្គម និងគម្រោងអភិវឌ្ឍន៍បច្ចេកវិទ្យាគមនាគមន៍និងព័ត៌មាន នៅក្នុងអង្គការសហប្រជាជាតិ (UN Agencies) និងដៃគូអភិវឌ្ឍន៍អន្តរជាតិ។
• អ្នកស្រាវជ្រាវនិងអ្នកសម្របសម្រួលតំបន់៖ ធ្វើជាអ្នកជំនាញការ និងអ្នកស្រាវជ្រាវក្នុងអង្គការមិនមែនរដ្ឋាភិបាលជាតិ-អន្តរជាតិ (NGOs/INGOs), អ្នកសម្របសម្រួលកិច្ចការតំបន់អាស៊ាន ឬបន្តការសិក្សាថ្នាក់បណ្ឌិត (PhD)។

មុខវិជ្ជាសិក្សា

ឱកាសការងារ សម្រាប់និស្សិត