density_small
search
កម្មវិធីសិក្សាថ្នាក់បរិញ្ញាបត្រ ជំនាញភាសាអង់គ្លេស នៃដេប៉ាតឺម៉ង់ភាសាអង់គ្លេស មហាវិទ្យាល័យសិល្បៈ មនុស្សសាស្ត្រ និងភាសាបរទេស នៃសាកលវិទ្យាល័យ អាស៊ី អឺរ៉ុប គឺជាកម្មវិធីសិក្សារយៈពេល ៤ ឆ្នាំ (ស្មើនឹង ៨ ឆមាស សរុប ១២៦ ក្រេឌីត) ដែលត្រូវបានរៀបចំឡើងយ៉ាងសម្រិតសម្រាំងដើម្បីឆ្លើយតបទៅនឹងតម្រូវការនៃការអភិវឌ្ឍធនធានមនុស្សក្នុងយុគសម័យសកលភាវូបនីយកម្ម និងសេដ្ឋកិច្ចផ្អែកលើចំណេះដឹង។ កម្មវិធីនេះត្រូវបានអភិវឌ្ឍឡើងដោយផ្អែកលើគោលការណ៍អប់រំផ្អែកលើលទ្ធផលសិក្សា និងស្របតាមក្របខណ្ឌគុណវុឌ្ឍិជាតិកម្ពុជា កម្រិតទី៦ ដោយរួមបញ្ចូលគ្នាយ៉ាងមានរចនាសម្ព័ន្ធនូវមុខវិជ្ជាអប់រំទូទៅ មុខវិជ្ជាគ្រឹះ មុខវិជ្ជាស្នូល ការហ្វឹកហាត់ប្រតិបត្តិ និងការចុះកម្មសិក្សាជាក់ស្តែង ដើម្បីធានាថានិស្សិតទទួលបាននូវចំណេះដឹងទូលំទូលាយទាំងផ្នែកភាសាវិទ្យា អក្សរសាស្ត្រ វប្បធម៌ និងវិធីសាស្ត្របង្រៀន។
កម្មវិធីសិក្សានេះបង្កើតឡើងក្នុងគោលបំណងអភិវឌ្ឍ និងបណ្តុះបណ្តាលនិស្សិតឱ្យមានសមត្ថភាពប្រើប្រាស់ភាសាអង់គ្លេសប្រកបដោយប្រសិទ្ធភាពខ្ពស់ និងមានជំនាញវិជ្ជាជីវៈច្បាស់លាស់ ទាំងក្នុងការស្ដាប់ ការនិយាយ ការអាន ការសរសេរ ការបកប្រែ និងការបង្រៀន ដើម្បីអាចប្រកួតប្រជែងក្នុងទីផ្សារការងារជាតិ និងអន្តរជាតិបាន។ លើសពីនេះ កម្មវិធីនេះមានគោលដៅពង្រឹងសមត្ថភាពការគិតវិភាគ ការដោះស្រាយបញ្ហា ការស្រាវជ្រាវ ការប្រើប្រាស់បច្ចេកវិទ្យាព័ត៌មាន ជំនាញទំនាក់ទំនងអន្តរបុគ្គល និងភាពជាអ្នកដឹកនាំប្រកបដោយការទទួលខុសត្រូវ និងក្រមសីលធម៌វិជ្ជមាន ក្នុងការត្រៀមខ្លួនបំពេញការងារជាគ្រូបង្រៀន អ្នកបកប្រែ មន្ត្រីរដ្ឋបាល ឬបន្តការសិក្សានៅកម្រិតជាន់ខ្ពស់។
និស្សិតដែលបានបញ្ចប់ការសិក្សាថ្នាក់បរិញ្ញាបត្រ ជំនាញភាសាអង់គ្លេស អាចមានឱកាសការងារនៅក្នុងស្ថាប័នរដ្ឋ ឯកជន អង្គការជាតិ និងអន្តរជាតិ ព្រមទាំងអាជីវកម្មឯកជននានា ដូចខាងក្រោម៖
ក្នុងបរិបទនៃសកលភាវូបនីយកម្ម និងការធ្វើសមាហរណកម្មសេដ្ឋកិច្ចតំបន់អាស៊ាន ភាសាអង់គ្លេសបានក្លាយជាឧបករណ៍ទំនាក់ទំនងដ៏សំខាន់មិនអាចខ្វះបាន ក្នុងវិស័យអប់រំ ពាណិជ្ជកម្ម និងទំនាក់ទំនងអន្តរជាតិ ដែលធ្វើឱ្យតម្រូវការធនធានមនុស្សដែលមានសមត្ថភាពប្រកបដោយវិជ្ជាជីវៈមានការកើនឡើងយ៉ាងខ្លាំងនៅក្នុងទីផ្សារការងារកម្ពុជា។ កម្មវិធីសិក្សាថ្នាក់បរិញ្ញាបត្ររង ជំនាញភាសាអង់គ្លេស នៃដេប៉ាតឺម៉ង់ភាសាអង់គ្លេស មហាវិទ្យាល័យសិល្បៈ មនុស្សសាស្ត្រ និងភាសាបរទេស នៃសាកលវិទ្យាល័យ អាស៊ី អឺរ៉ុប ត្រូវបានរៀបចំឡើងស្របតាមក្របខណ្ឌគុណវុឌ្ឍិជាតិកម្ពុជា កម្រិតទី៥ ដោយសិក្សារយៈពេល ២ ឆ្នាំ (៤ ឆមាស សរុប ៦០ ក្រេឌីត)។ កម្មវិធីនេះផ្តោតលើការបណ្តុះបណ្តាលបែបបង្រួម និងសម្បូរទៅដោយការអនុវត្តជាក់ស្តែង ដោយបែងចែកតុល្យភាពរវាងទ្រឹស្តីក្នុងថ្នាក់ (៤៤ ក្រេឌីត) និងការសិក្សាប្រតិបត្តិ (១៦ ក្រេឌីត)។ លើសពីនេះ កម្មវិធីសិក្សាបានបញ្ចូលនូវមុខវិជ្ជាអប់រំទូទៅ មុខវិជ្ជាគ្រឹះ មុខវិជ្ជាស្នូល ជំនាញកុំព្យូទ័រការិយាល័យ និងរដ្ឋបាលសាធារណៈ ដើម្បីធានាថានិស្សិតទទួលបានចំណេះដឹង និងសមត្ថភាពពេញលេញក្នុងការអនុវត្តការងារជាក់ស្តែង។
កម្មវិធីសិក្សានេះបង្កើតឡើងក្នុងគោលបំណងបណ្តុះបណ្តាល និងពង្រឹងសមត្ថភាពនិស្សិតលើជំនាញភាសាអង់គ្លេសទាំង៤ (ស្តាប់ និយាយ អាន សរសេរ) ចាប់ពីកម្រិតដំបូងរហូតដល់កម្រិតខ្ពស់មធ្យម ព្រមទាំងការសរសេរតាមបទដ្ឋានសិក្សា អក្សរសិល្ប៍ និងការយល់ដឹងពីវប្បធម៌ចម្រុះ។ បន្ថែមពីនេះ កម្មវិធីនេះមានគោលដៅបំពាក់បំប៉នជំនាញវិជ្ជាជីវៈគាំទ្រ ដូចជាការប្រើប្រាស់បច្ចេកវិទ្យាព័ត៌មាន កុំព្យូទ័រការិយាល័យ និងចំណេះដឹងរដ្ឋបាលសាធារណៈ ព្រមទាំងអភិវឌ្ឍការគិតបែបវិភាគ ជំនាញទំនាក់ទំនង ធ្វើការជាក្រុម និងក្រមសីលធម៌វិជ្ជាជីវៈ។ គោលបំណងចុងក្រោយ គឺដើម្បៀបចំ និងផ្តល់ជូនទីផ្សារការងារនូវជំនួយការរដ្ឋបាល លេខាធិការ បុគ្គលិកទំនាក់ទំនង និងបំពេញលក្ខខណ្ឌគ្រប់គ្រាន់សម្រាប់និស្សិតក្នុងការឈានជើងចូលធ្វើការងារភ្លាមៗ ឬបន្តការសិក្សាថ្នាក់បរិញ្ញាបត្រនៅឆ្នាំទី៣ និងទី៤។
និស្សិតដែលបញ្ចប់ការសិក្សាថ្នាក់បរិញ្ញាបត្ររង ជំនាញភាសាអង់គ្លេស អាចបំពេញការងារក្នុងតួនាទីជា៖
