density_small
search
ដំណើរកម្សាន្តគ្រួសារ អាស៊ី អឺរ៉ុប ទៅកាន់ខេត្តកែប និងខេត្តកំពតនារដូវកាលបៃតង ឆ្នាំ២០២៦
នាថ្ងៃទី១៨ ខែមិថុនា ឆ្នាំ២០២៦ សាកលវិទ្យាល័យ អាស៊ី អឺរ៉ុប សហការជាមួយក្រសួងទេសចរណ៍ បានរៀបចំដំណើរកម្សាន្តគ្រួសារ អាស៊ី អឺរ៉ុប ទៅកាន់ខេត្តកែប និងខេត្តកំពត នារដូវកាលបៃតង ឆ្នាំ២០២៦ ដោយមាន ឯកឧត្ដម កាទើ មហាំម៉ាត់ណោសស្រ៊ី រដ្ឋលេខាធិការក្រសួងទេសចរណ៍ និងជាអនុប្រធានអចិន្ត្រៃយ៍ក្រុមការងារជំរុញយុទ្ធនាការទេសចរណ៍ក្នុងរដូវកាលបៃតង (ក.ទ.ប.) តំណាងដ៏ខ្ពងខ្ពស់ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ អមដោយ ឯកឧត្តម មហាំម៉ាត់ យូណេះ អនុរដ្ឋលេខាធិការ និងជាប្រធានលេខាធិការដ្ឋាន ក.ទ.ប. អញ្ជើញសំណេះសំណាល និងជូនដំណើរ គណៈគ្រប់គ្រង បុគ្គលិក យុវជន ស.ស.យ.ក. និង ក.ក្រ.ក. នៃសាកលវិទ្យាល័យ អាស៊ី អឺរ៉ុប សរុបចំនួន ១២៤រូប។
លោក ស៊ុន សេដ្ឋា សាកលវិទ្យាធិការនៃសាកលវិទ្យាល័យ អាស៊ី អឺរ៉ុប បានបញ្ជាក់ថា គោលបំណងនៃដំណើរកម្សាន្តនេះ យោងតាមផែនការសកម្មភាពរបស់សាកលវិទ្យាល័យ និងដើម្បីគាំទ្រយុទ្ធសាស្រ្តរបស់រាជរដ្ឋាភិបាលកម្ពុជា ជាពិសេសយុទ្ធនាការក្នុងការជំរុញចលនាទេសចរណ៍នារដូវកាលបៃតងរបស់ក្រសួងទេសចរណ៍។ ដំណើរកម្សាន្តនេះមិនត្រឹមតែជាសកម្មភាពកម្សាន្តប៉ុណ្ណោះទេ ប៉ុន្តែជាមធ្យោបាយដ៏មានប្រសិទ្ធភាពក្នុងការពង្រឹងសាមគ្គីភាព អភិវឌ្ឍសមត្ថភាពវិជ្ជាជីវៈ លើកទឹកចិត្តបុគ្គលិក និងជំរុញឱ្យសាកលវិទ្យាល័យមានការអភិវឌ្ឍន៍កាន់តែមានការរីកចម្រើនពីមួយឆ្នាំទៅមួយឆ្នាំ ព្រមទាំងជំរុញដល់ការផ្សព្វផ្សាយនូវតំបន់ទេសចរណ៍ក្នុងស្រុកថែមទៀតផង។ លើសពីនេះទៅទៀតលោកក៏បានពាំនាំប្រសាសន៍ផ្ដាំផ្ញើ និងថ្លែងអំណរគុណ របស់ អ្នកឧកញ៉ា លី ឃុនថៃ ប្រធានក្រុមប្រឹក្សាភិបាលនៃសាកលវិទ្យាល័យ អាស៊ី អឺរ៉ុប និងលោកជំទាវ ជូនចំពោះ ឯកឧត្តមរដ្ឋមន្រ្តីក្រសួងទេសចរណ៍ ថ្នាក់ដឹកនាំ និងមន្រ្តីរាជការនៃក្រសួងទេសចរណ៍ទាំងអស់ ដែលបានជួយសម្របសម្រួលលើដំណើរកម្សាន្តនេះប្រព្រឹត្តទៅដោយរលូន និងសប្បាយរីករាយ។
គូសបញ្ជាក់ផងដែរថា ក្នុងដំណើរកម្សាន្តនេះ គណៈគ្រប់គ្រង បុគ្គលិក យុវជន ស.ស.យ.ក. និង ក.ក្រ.ក. នៃសាកលវិទ្យាល័យ អាស៊ី អឺរ៉ុប បានទស្សនាឆ្នេរកែប និងទិដ្ឋភាពនៃក្រុងកែប ខេត្តកែប ទស្សនារូងភ្នំកំពង់ត្រាច រមណីយដ្ឋានទឹកឈូ រូបសំណាកសេះសមុទ្រ និងទិដ្ឋភាពទូទៅនៃក្រុងកំពត ខេត្តកំពត។
